!. Kang pito pa lang ako ka bulan , ginhulid ako ni Nanay nga nagabatang sa salog nga kawayan. Naturugan tana.Nagdalhag ako kag naglusot sa buho kang salakan. (Ang salakan amo ra ang kahignga kawayan kang lusong nga ginapalusot sa salog kag ginabugsok sa lupa agud indi magduwangduwang ang lusong kon magbayo.) Nakabugtaw si Nanay sa akon hibi pay natingala tana nga karayo kang akon limog. Naglingling tana sa salog kag nakita na ako nga nagbugsok sa puno kang salakan.Nagkadlaw tana nga nagkuon nga,"Ay ! turon si Nene hay !" Ang libayon na nga si Tita Iking nagdalandan panaog agud balutbuton ako nga nagahiribion kag nagapamuyayaw nga, "Ang linti, mapatay ron lang bata na, makadlaw pa !" Amo to ang "Bagtol No.1".Wara ako mapatay pay naglupyak ang akon alimpurusan. Narelocate ang akon alimpuros kag nagtaralang ang pagtubo kang akon buhok ,gani nagtingkarag nga daw padong kang manok nga sulog. Karaan gani ako ni Lola,kun-an na ako nga ," Balingis kaw gid it alimpuros!" .
2. Kang apat ron ako ka tuig, nangahoy ako kang suwak kag barayubay. Daw si ogret ako magsapnay kang pinangahoy ko pasakasa sa hagdan ay gindayawdayaw ako ni Nanay nga, "Abaw, masyado ka tandos !" . Nagsang-at ang suwak sa halintang kang hagdan Nahulog ako nga kaya pati palad. Nakaulon ako sa hanggod nga bato kag nagbukol ang bagol ko sa ibabaw kang akon tingkoy.Amo to ang "Bagtol No. 2". Natuslok kang tarawis nga punta kang suwak ang tuo ko nga kilid sa idalum kang akon gusok .Wara ako ginpadoktor.; gindaskan lang kang kinumos nga balunggay ang buho nga daw agi kang operasyon ang pinalian.
3. Kang lima ako ka tuig, nagsunod ako kay Nanay mag-agto sa pihak balay. Mauna daan ako uli ay kabuhay kana. Nagpungko ako sa atangan kag idab-ot sa una nga halintang ang akon kahig. Nagdapyos ang akon kahig sa mahining kag madanlog nga halintang nga kawayan. Nagdaguldol ako sa pito ka halintang kag nagtibusok nga daw eroplano nga nag-crash landing.Nagtupa ako sa malapad nga bato sa kunsadan nga una ang ulo. Amo to ang "Bagtol No 3". Nasisi ang akon dahi . Wara ako gindara sa doktor. Ginhampulan lang kang kinumos nga balunggay ang akon pilas nga kang ngapali ,nagdalumdalom nga daw giri kang alkansiya.
4. Kang anum ako ka tuig, Grade I ako sa Tigbauan Elem. School. Sangka aga nga recess namon, nagdalagan ako paagto sa Girls' Toilet. Nasugata ko ang sangka Grade 6 boy nga nagadalagan paagto sa shop pay wara ako makadepara sa ana ginapas-ann nga kawayan, gani nag-head-on collision ruman ako sa kawayan . Nasungkit kang utbong kang pusog ang wala ko nga dungandungan kag napilas kag nagdugo. Amo to ang "Bagtol No. 4". Wara plaster sa clinic gani ginbedaheyan kang gauze ang akon ulo. Nag-uli ako nga nagapulus kang puti nga daw si Princess Urduja .En vez nga magpanic, una nga tikab ni Nanay, "Sin-o ruman kontra mo?" Basta may samad gani ako mag-uli, panurok na kanakon, warrior nga halin sa patag-awayan.
5.Kang college ako, nagsuksok ako kang uso nga sapatos nga "duck heels". Sa second floor kang Rada Hall ang klase namon sa English. Kang manaog ako, nagsab-it sa metal edging kang hagdan ang akon duck heel . Nag-dive ako nga wara makaagi sa mga halintang kag naghaplak it pasubsub nga daw sa borador nga nabugtuan kang lubid. Nag-head bang ako sa cement floor pay wara man maglitik ang bat-ulan ko nga ulo. Nagbukol lang ang akon agtang. Amo to ang "Bagtol No. 5" . Daw tinday nga unicorn nga nagapatubo kang ana sungay ang hitsura ko.
6. Kang. nagmaestra ako, nadestino ako sa Jamog Elem. School. Sangka mauranon nga aga kang Hulyo, nagsakay kami sa dyip pauma. Sa front seat nga sa binit gid ako nakapungko ay urihi takon. Nagpangurabot langsa barandilya ang tuo ko nga alima ay nagatibi ron ako. Pag-abot sa takladon, npatay ang makina, nag-atras paidalum ang dyip nagdalihhig paagto sa kakahunan kag nagtakilid. Ang alima ko nga nagauyat sa barandilya, naglubong sa lao kang bag-ong arado nga taramnan. Nagbukol ang akon lubulubuan ay nabadol ko ang atop kang dyip , pay wara ako pilas ; daw may lukdo lang ako nga chocolate hill. Amo to ang "Bagtol No.6". Nagbantog sa banwa nga utod gid kuno ang alima ko kag kahig ay kita nanda nga haros nagakawas ron ang lawas ko sa front seat paghalin kang dyip. Sugong nga patdanay sa daily double. Ginlibot nanda ang mga ospital sa pagpangita kon diin ako naadmit , gai kara, sige amon klase to sa uma.
7.Kang dekada otsenta nga eleksyon ginsuportahan kang akon bana si Zulueta pay si Britanico tana ang akon ginboto. Pagkamaan na, nag-uli tana it kaagahon nga pwerte ka balong.Gintawag na ako nga traidor kag gitayaan kang thompson nga loaded. Gindakop ko ang kanyon kang thompson kag ginwarik dara lalas Nasuntok kang punta kang kanyon ang tuo ko nga dungandungan kag napilas. Amo to ang "Bagtol No.7" Timbang ron ang akon pal-it sa akon wala kag tuo nga dungandungan.Daw kanding ako nga torete nga napungilan kang darwa ka sungay. Ginhakot ko ang akon mga bata kag mag-uli sa banwa sa akon Lola.Nag-exit ako sa danger zone sa wara pa maimpas ang nabilin sa siyam ko ka kabuhi nga tinago sa idalum bato. Gin-agtunan ako kang drunken master sa banwa. Kuon kang Lola ko, "Kon indi kaw ron kana kara, iuli lang ay sapupuhon namon ; pay indi mo pagpasipad-an ay kapin pa sa itlog ang paghalong namon kara".
Kar-on nga tuig 2024, otsenta anyos ron ako pay naga-bangs pa gihapon ukon nagapataplik kang buhok sa agtang nga daw si Rizal.
