Hilway na Kita

Ika-deceocho nga adlaw sang Marso,
Tuig mil nueve cientos cuarenta'y cinco,
Samtang nagatulog ang mga Tigbaueño,
Kahilwayan namukaw nga katulad sang damgo.

Magagmay nga balod ang nagaharana,
Sa kantilado nga baybayon sang Parara,
Nag-abot ang  Seventh Fleet nga barko de guera,
Kalim-an ang estrella sang ila bandera.

Nanaog sa barko ang mga soldado,
Lunsay mga batid kag hanas nga marino,
Mga batalyador sa Dagat Pasipiko;
Sila mga inanak sang daku nga estado.

Kag sa kalangitan sang bilanggo nga banwa,
Dungan sa pagbuskad sang masanag nga aga,
Naglinupad, eroplano  sang Amerika;
Ang mga nakakita, nakugmat kag natingala.

Ang mga eroplano, naglupad nga may porma,
Kon imo tulukon, daw higante nga letra;
Letra nga "V",amo ang sa langit mabasa,
Kon sayuron,"Victory", o kadalag-an na.

Garison sang Hapon, gin-ulan sang bomba,
Ang mga Hapones,nagtal-as, naglinapta;
Ang mga pumuluyo sang bug-os nga isla,
Sa bagrong kag linupok,nagsinalasala.

Ang tanan nga tawo, bisan may kulba pa,
Nagsugod sa paghugyaw kag sa pagkinasadya;
Nagtumbo nga may luha ang mga mata,
Kag nagsinggit sila nga "Hilway na kita!"

Ang nagahukmong nga Hapones sa Central School,
Sa ila kalutusan wala na gid makaisol;
Gani, sa mga Kano, armas nila gintunghol
May carbine,may Thompson,machine gun kag rifle.
i
Gikan sa kabukiran kag mga kaumhan,
Nagbaha padulhog ang mga sibilyan;
May balo, may ilo, tigulang kag kabataan;
Nagakadlaw, nagahibi,indi maintindihan.

Sa mga dalanon, nagdagsa ang mga tawo,
Ila ginsugata mga Kano nga soldado;
May nagapangamusta,may nagsinaludo,
Ang ginasulitsulit:"Victory!Victory Joe!".

Panong sang mga tawo, sa banwa dumeretso,
Didto sa plasa nga ginhimo nga kampo;
Ila ginpangita,Hapones nga mga preso,
Ila gin- guramus,kag ginpakdol ang ulo.

May ara nagahibi kag nagapasipala,
Sa mga nag-surrender na nga mga kontra;
May ara nagabato,may masumbag sa ila,
 Agud lang mapautwas ang kaakig nila.

"Victory Joe!"ang hugyaw sang bug-os nga puod,
Gutom kag kapiut, sa kalipay nalunod;
Naanod man pati ang huban nga kalisod,
Paglaum ginbanhaw sang paghilway sang pungsod.

"Hilway na kita !",tuaw sang Tigbauanon,
Nga naglanog sa madamo nga dinag-on;
"Hilway na kita!",sadto,singgit sang pagkamadinalag-on,
Sa karon,...isa ka palamangkutanon!