Ang Flores de Mayo kag Santacrusan

Ang bulak simbolo sang kaputli , katahum kag paglaum.Ang mga bulak nga ginahalad kay Birhen Maria nga amo ang ginakabig nga reyna sang kabulakan ginatawag nga “Flores de Maria”.

Ginahiwat ang paghalad sang mga bulak kay Birhen Maria bilang pagsunod sa ginhimo sang tatlo ka bata nga sanday Jacinta, Francisco kag Lucia didto sa Fatima, banwa nga sakop sang pungsod Portugal. Nangin batasan sang tatlo ka bata nga samtang nagapangahoy, nagpanguha man sila sang mga bulak nga ilahas kag ginhalad sa Birhen Maria. Sang ika-13 sang Mayo, tuig 1917, nagpakita sa ila ang Birhen sa una nga kahigayunan. Ginpangayo sang Birhen sa ila nga padayunon ang pagdebosyon sa iya kag ang pagpangamuyo sang mga tao para sa kaluwasan sang bug-os nga kalibutan.

Gindala sang mga pari nga Catolico sa Pilipinas ang tradisyon sang “Flores de Maria”agud mahagad ang mga kabataan sa simbahan kag makilala kag higugmaon ang Birhen Maria bilang iloy kag modelo sugod pa sa linghod nga pangidaron. Paagi man ini nga makabaton sila sang Catecismo kag mawili sa simbahan kag mahilayo sa mga malain nga buluhaton.

Sa katapusan sang Mayo ginaprusisyon ang Mahal nga Birhen kag ginaupdan sang mga dalaga nga nagarepresentar sang lainlain nga titulo sang Birhen Maria nga ginpatungod sa iya suno sa ginamitlang sa litaniya. Ini nga mga dalaga ginatawag nga mga “Birhenes”.

Kadungan sa selebrasyon sang “Flores de Maria”amo ang “Santa Cruz de Mayo” o Santakrusan. Ini ang paghanduraw kay Reyna Elena kag kay Rey Constantino sang Roma. Suno sa kasaysayan, si Constantino nga isa ka pagano nakakita sang nagadabdab nga krus sa kalangitan samtang nagapakadto sa patag-awayan. Sa idalum sang amo nga krus, nabasahan niya ang nakasulat sa Griyego nga mga tinaga nga, "Sa sini nga timaan, ikaw magadaog”. Nagdaog siya sa inaway kag nakonbertir siya sa pagka-Kristiyano. Iya ginhimo ang Kristiyanismo nga relihiyon sang iya ginharian kag ginpalapnag ini sa bug-os nga estado.

Ang iya iloy nga si Reyna Elena pirme ginatublag sang isa ka damgo nahanungod sa krus nga ginlansangan kay Kristo. Gani, upod sa iya anak nga si Constantino kag pila ka mga hangaway,iya ginpangita ang balaan nga krus sa Kalbaryo. Iya ini gindala sa Roma kon sa diin ginhamtang sang obispo sa Basilika.

Sa Pilipinas, ang Santakrusan ginapangunahan ni Reyna Elena, upod kay Rey Constantino, ang obispo kag ang iban pa nga mga reyna nga maisog nga nagpangapin kag nagpalapnag sang Kristiyanismo,katulad nanday Reyna Isabel,Reyna Esther kag Judith.

Ang “Flores de Maria kag Santa Cruz de Mayo” mga selebrasyon sang Simbahan Catolico nga nagapahanumdum sa bug-os nga kalibutan sang papel ni Birhen Maria bilang iloy sang Dios, iloy naton tanan kag modelo sang mga kababaehan. Nagapadumdum man ini sang importansya sang mga babae sa kaluwasan sang mga kataohan kag mga kapungsoran.