Salamat Gid,Msgr.Rolando A.Haguisan

November 30,2o17 Suno sa dinalan sang isa ka daan nga ambahanon,”After the ball is over,after the day is done ,many a heart is broken,many a love is gone”...Pero sa kaso sang mga Tigbauanon, kon ang siyam ka tuig nga pagpakig-upod sang aton mahal nga Msgr. Haguisan diri sa aton parokya isa ka binayle, wala ini nagatapos sa isa ka broken heart kundi sa isa ka malipayon nga mga handurawan; wala naalimunaw ang pagpalangga, kundi nagpabilin sa tagipusuon.Ini tungod kay si Msgr. Haguisan isa ka halandumon kag indi malipatan nga amay sang aton parokya.Instrumento siya sang paghiliusa sang mga tumuluo kag pagsanyog sang Simbahan.May panimuot siya nga very approachable,accommodating, warm,cordial and very generous.Dugang pa sini, may aura siya nga cute and lovable ,kasubong sang isa ka inosente nga bata,pero ang iya amaynon nga pagpakigbagay sa tanan, nakahaylo sa mga katapo sang Simbahan nga magkooperar kag mangin matinumanon. Gin-ubayan niya ang iya mga sinakpan paagi sa good counsel and inspiration.Wala sing unkind words and indignation nga mabatian sa iya gani nangin tayuyon ang harmonious endeavor para sa kaayuhan sang parokya;amo nga ang Tigbauan may pinakadamo nga seminarista kag katekista sa diocese. Pero sa aton kabuhi may panahon sang pag-abot kag may panahon sang paghalin.Isa ini ka proseso sang kinaugali nga indi malikawan ka wala kita sing choice kundi atubangon.Ano man ka malahalon sa aton ang isa ka bagay ukon tao,kinahanglan batunon naton ang masubo nga kamatuoran sang paghilayuay. Sa mga Tigbauanon,ginaindian gid nila ang tinaga nga “Paalam”.Tama ini ka sakit nga tinaga nga indi nila mamitlang kay indi nila luyag ang ideya nga sila ginabayaan.Gani nga wala sing katumbas nga tinaga ang “paalam”sa pulong nga Tigbauanon.Ang sarang lang nila mabungat amo ang”Mayad lang nga pagpanaw”. Sa aton mahal nga ispiritwal nga amay,Msgr. Rolando A. Haguisan,kabay pa nga ubayan ka unta sang Makaako sa imo paglakat padulong sa bag-o mo nga destinasyon.Salamat gid sa madamo nga mga matahum,malipayon kag maayo nga mga handumanan nga imo ginabilin sa amon tagipusuon. Sa katapusan, amon ginabayaw kag ginasantik ang amon mga kopa sang Kristohanon nga alak kag ginatibyong para sa kadalag-an sang aton huwaran nga ispiritwal nga amay!