Sangka bes, kang dekada 90, nagpatawag kang meeting ang TESTA. Ginhambalan kon matao kang necrological sevice kag death aid sa retired teacher, ukon indi.Hambal kang nagaprotesta, naga kuno ma-"necro" pa sa retired teacher ay wara ruman tana sa serbisyo?
Ginahaya kato si Mrs. Tiquison nga retired teacher kang Bagumbayan Elementary School. Nagatudlo ako sa Bagumbayan, gani bisan may stage fright ako, nagtindog ako sa pagsabat. Kuon ko, "Naga ngilin gid kamo mag-necro sa retired teacher ay ang maestra, bisan ano ka hina,may nahimo man ra nga mayad sa sulod kang haros kwarenta ka tuig na sa serbisyo? Bisan sa pagtudlo na lang ra sa mga bata sa pagsulat ka ngaran nanda, sa pagpanabon na sa aramutan nanda halin sa sangkidit na nga sweldo, kag sa pag-amot na sa nagkaramatay na nga co-teacher ukon anda partidos.Sala na bala ra kon wara lagi tana mapatay kang sa serbisyo pa? Para maman-an kang tanan,ang Bagumbayan Elementary School, nagasarika sa lupa nga gin-donate kang tatay ni Mrs. Tiquison. Ang pulis gani nga wara ka lapak college,sobra lang pulo ka tuig sa serbisyo ay napyerde ang politiko nga nag-appoint kana,kag kang sa serbisyo pa tana, ginabaklan na kang trenta sentimos nga habon hamot kag parigusan sa bomba it alas dos sa kaagahon ang buang.Dayon, patuwangan na sa mga iboy kang tienda paagto sa idalum eskwelahan ay digto nanda udakan.Bation sa balay ang siyagit kang buang ay nagasarab-it sa barbed wire samtang ginapasakay sa kudal. Ti, kang mapatay ang amo nga pulis,ginhaya gid sa munisipyo, gintabunan pa kang bandera, naka-half-mast ang bandera kag may 21 gun salute."
Masabat pa daan ang nagaprotesta, pay nalidis ang nasandig nga tapi sa dingding nga wara man it hangin kag natumba daan kana kon wara masagang kang sangka maestro. Kuon kang mga teachers, ginamurtuhan ron tana kang kalag.Ti, kundi, halin kato gin-necrohan man nanda ang retired teacher. He he he.
No comments:
Post a Comment