Masaya Ako

 Ipinaglihi ako sa sampagita,

Isinilang na malakas at maganda;

Kalahating Adan at kalahating Eba,

Sadyang pinagkatuwaan ng tadhana.

Laging kinukutya't pinagtatawanan,

At tinatawag na malas kahit saan;

Di nila inisip na ako'y nasaktan,

Dahil tao ring may mga karapatan.

Ganito man ako'y di ko kasalanan,

Diyos ang nakakaalam ng dahilan;

Damdaming salungat sa kaugalian,

Umaalipin sa buong katauhan.

Pilit kong iwinaksi, pinaglabanan,

Ngunit pagsupil, di ko makakayanan;

Katauhang tinatakwil ng isipan,

Ng aking puso ay pinagsisigawan.

Di ko ginustong isilang nang ganito,

Di man matanggap, sana'y unawain n'yo;

Dahil sa aking buhay ay masaya ako,

At may sulok ding takda dito sa mundo.

(To all the Gays I love)