Himno sang Tigbauan

Bilidhon ka nga hiyas Tigbauan,

Malapad nga baybay ang katipan; 

Bahandi nga labing tinipigan,

Sang amon mga katigulangan.

Sa bugana mong patag, Tigbauan,

Ginpanggas sang amon ginikanan,

Mga handum sang katibawasan ,

Kag mga damgo sang kauswagan.

Tigbauan, pinalabi sang Diwa,

Duna ikaw nga mahamungaya;

Isa ka suba ang 'gaalila,

Sang silak sang adlaw, nga pinalangga.

Tigbauan, matinggas ang mga uhay,

Ang tuba mo, dugos ang kaangay;

Marimis ang mga isda sa baybay,

Kag may maanyag nga mga lin-ay.

Sa imo, Tigbauan, may paglaum,

Madamo ang manggad nga likum,

Gintigana sa mga matutom;

Ang mapisan indi gid magutom.

Sa simbahan mo kag mga dalan, 

Nakasulat sa dugo kag luha.

Sang imo nga mga kaanakan,

 Ang imo kasaysayan,Tigbauan !

Tigbauan, ikaw ang paraiso,

Nga ginapuy-an sang mga tao,

Nga simpatiko kag karinyoso ,

Kag sa Dios, himpit ang pagtuo.

Tigbauan, matahum kag matawhay,

Pugad sang kahirup kag kalipay ;

Mabuhay ka, amon banwang hilway,

Mabuhay ka, Tigbauan ! Mabuhay!