Isa ako ka diutay nga tingog nga nagapanawagan :
Bisan bata lang, pero mabaskog nga nagapaninduga
Nga kami may mga kinamatarong man
Nga dapat kilalahon kag tahuron sang tanan.
Kinamatarong ko nga dapat tatapon sing may paghalong,
Ang lawas kag hunahuna pasanyugon kag itib-ong,
Agud magdaku nga may mga pagpasulabi nga tadlong
Kag sa mabungahon nga kabuhi magpadulong.
Kinamatarong ko ang husto nga edukasyon,
Desnte nga panapton kag sampat nga pagkaon
Puluy-an nga luwas sa katalagman kag mapag-on,
Kag pamilya nga mapinalanggaon kag mahidaiton.
Kinamatarong ko man nga mahilway sa pagpang-abuso,
Kag mapangapinan sa mga maintas nga mga tao:
Indi paghatagan sang mga mabug-at nga trabaho ,
Nga makabutang sa kabuhi ko sa peligro.
Agu ang mga kinamatarong ko maprotoksyonan,
Kinahanglan ang pagsakdag sa panguluhan,
Kag ang hugot nga pagpatuman sang kasuguan,
Nga nagapangamlig sa mga kabataan.
Kabay nga ang mga panugdaon ko tamdon ninyo
Kag ang mga kinamatarong ko inyo irespeto
Kag kon ang bug-os nga kalibutan bungol sa tingog ko,
Ang akon panawagan, isinggit ko sa Ginoo!
:
No comments:
Post a Comment