MATEMATIKA

Sang mabun-ag ako sining kalibutan,

Ginpagkit ni Nanay agud indi malipatan

Ang pat-od nga petsa sang akon kaadlawan 

Sa takop sang amon antigo nga kaban.

Karon, sa tagsa ko ini masiplatan,

Nagalabay sa akon nga panumduman,

Ang kabuhi, malip-ot  o  malawig man,

Numero ang panugod kag katapusan.

Ang kabuhi human sa matematika,

Kay maghalin sa pagkabugtaw mo sa aga,

Tanan nga hulag kag obra ginakwenta,

Kalkulado mga oras kag distansya.

Madamo ang indi sa matematika,

Kay ang numero mabudlay imemorya;

Apang dumduma ang iya importansya,

Kay iloy ini sang tanan nga siyensya.

Kon ang matematika bale-walaon,

Indi gid mag-uswag ang aton nga nasyon;

Mangin kinaradto ang sibilisasyon,

Pierde kita sa global nga kompetisyon.

Nagkiwi ang piramida sang Ehipto,

Kon ang kalkulasyon sadto indi  husto;

Ang musika indi magsanto ang tempo,

Kon indi tungod sa kumpas nga de numero.

Bisan ang binalaybay gani, may metro,

Kag ang inoras ginasukol sa segundo;

Matematika - gamit sa pag-imbento,

Kag pagtuon sang bug-os nga uniberso.

Kinahanglan gid ang matematika,

Nga ginatawag, "eksakto nga siyensya";

Para gid sa tanan nga mga tinuga,

Kay bisan damang, nagatakos kang lawa na!

Gani kita tanan dapat manuto na, 

Matemateka, padalman sang pensada;

Agud mangin bansagon man ang pungsod ta

Sa patag sang binag-ong teknolohiya.