Paghinunod

Atubangon naton ang paghinunod,
Sing may kalipay kag kabakod;

Nagakambitanay  ukon nagasungkod,

Bantayan ta ang adlaw sa pagtunod.

Isipon nga ini ang Amay naton,

Nga nagapauli sa puluy-an nga langitnon;

Kag  kita, nagasunod agud papahuwayon,

Matapos ang makapoy nga panglakaton. 

Sa pagkatahum sang adlaw tulukon,

Daw Dios, nagabanaag, humlad ang mga butkon;

Handa sa pag-abiabi kag pagbaton 

Malulo nga nagahulat sa pag-abot naton.

Kag samtang padulong sa paghinunod,

Ipaiway ang kahadlok kag kalisod;

Ihinguyang ang bilin nga tion nga 'gakamudmod,

Sa pagkalipay sing ululupod.

Indi pagkanuguni ang kahapon kay tapos na,

Hinugay palibog sang buas kay wala pa;

Karon ang tion nga atubangon ta,

Kalitan kag himuslan kay ari pa kita. 

Ipaambit ang lubos nga pagpalangga,

Sa mga kaupod kag mga himata;

Likawan ang pag-ugtas kag pagkagha,

Kay ang paghinunod, tion sang malinong nga hunahuna.