Ang Manunudlo

 Ang pagkamanunudlo isa ka propesyon nga balaan,

Kay ang manunudlo tulay sang mga pagtulun-an;

Mga ihibalo nga makapasulhay sang pangabuhian,

Kag makapasanyog sang pagpasulabi kag pagbinatasan.

Ang manunudlo ang nagahaw-as sa mga pamatan-on,

Gikan sa pagkaignorante pakadto sa pagkamangin-alamon;

Agud sing maayong pangabuhi makaangkon,

Kag indi mag-antos sa kabudlay kag kapigaduhon.

Sa bulig sang mauti nga mga maestro kag maestra,

Nga nagtudlo sang nanuhaytuhay nga asignatura,

 Ang mga bata sa ulihi makakita sing maayo nga obra,

Kag mabatak ang iya pamilya, pati man ang iya banwa.

Ang manunudlo , nagabutlak nga paglaum,

Iwag sa hunahuna nga masihit kag madulom;

 Tungod sa iya,indi mapulak ang tagsa ka handum,

Nga sa tuburan sang kinaalam, makainom.

Siya ang nagabanaag nga silak nga bulawan,

Bugay nga kasanag sa tunga sang kadudulman,

Agud nga sang tao dalayon nga matultulan,

Ang banas sang kaayuhan kag katarungan.

Ang mga henyo nga nabantugan,

Sa manunudlo,sadto anay nag-agi man;

Kon sila wala ginhanas kag gintudluan,

Ayhan, wala sila nangin sampaton kag mapuslan.

Ang manunudlo maukod nga nagapatigayon,

Sang bisyon kag misyon sang Department of Education,

Agud kauswagan,kalinong kag katawhay ang tayuyon, 

Kag makatibawas man ang bug-os nga nasyon.