Mahal nga Birhen Maria

 Mahal nga Birhen Maria,Iloy sang katauhan,

Sa imo pag-abot sining kalibutan, namuskad ang kabulakan,

Nag-amba ang kapispisan kag naghugyaw ang kalangitan,

Kay nabun-ag ang gintakda nga iloy nga labing balaan.

Bitu-on ka sa langit nga labing masanag,

Nga sa bug-os nga kalibutan, amo ang iwag;

Iloy sang sa Gihapon nga Panabang ang imo bansag,

Dalangpan nga sang Amay sa langit, sa amon ginhatag.

Ikaw, Mahal nga Birhen ang amon paglaum kag kaluwasan,

Tag-ampo namon sa Anak mo nga Labing Gamhanan;

Sa kaputli kag kaligdong , ikaw ang amon huwaran,

Birhen nga pinili nga sang sala nga panublion wala mahilabtan.

Bilang mga anak, imo kami tanan ginbaton,

Kay ikaw ang gintugyan sang imo Anak nga mangin iloy namon;

Gani ang amon kalag ginatinguhaan mo nga luwason,

Paagi sa pagtudlo sa amon nga mangamuyo kag magdebosyon.

Nagpakita ka sa mga tao sa madamo nga kahigayunan,

Kay sa kalaglagan kag kalautan, buot mo kami tabangan;

Paghigugma nga balaan ang imo kasangkapan,

Agud nga ang mga nagtalang kag nalisdan imo maubayan.

Kabay ang imo iloynon nga pag-ulikid hatagan kabilinggan,

Kag ang pangayo mo nga magbalik sa Ginuo ang mga tao, pamatian;

Agud maluwas ang bug-os nga kalibutan sa kalalat-an,

Kag masubay sang tanan ang dalan padulong sa Kahimayaan.

(Hambal ni Susan kay Fernando Poe Jr. :"Labis pa yata ang debosyon mo kay Mama Mary kaysa kay Jesus Christ, ah". Sabat ni Ronnie: ."Bakit, kung wala ang Mama Mary,meron kang Jesus Christ?"

Aral: Mahalaga ang ina.)