Ang mga Milagro kang Sto. Niño sa Tigbauan

Magluwas sa Niño sa baybayon kag ang nagatalikod kag nagaparigos nga Niño, may iban pa gid nga katanhagaan nga ginpakita ang Niño sa Tigbauan:

1. Ang Niño nga Nagpanugbong. Sangka mangingisda ang nag-agto sa kumbento kag ginsukot ang pari kang bayad sa isda nga ginbuol na kuno. Nagpanghiwara ang pari nga wara gid tana ka buol it isda sa tao. Ginpamirit gid kang tao nga may sangka bata nga lalaki nga nag buol kang isda kana kag nagkuon nga,"Sukta lang to ang pari sa kumbento". Ginpangita nanda ang amo nga bata,,asta nga nakasulod sanda sa simbahan. Sa anda kahayanghag, natangraan nanda ang Sto. Niño sa pedestal nga may sangka salay nga isda nga nasang-at sa ana alima. Natabo dya nga insedente kang tiempo ni Padre Cresencio Montinola, circa 1838-1935.

2. Ang Niño nga may Bola. Sa kunsadan kang taytay nga nagaangot sa Parara kag poblacion, sangka nagauran-uran nga kaagahon, may bata nga lalaki nga nagpadulog sa trak nga Santacera agud makasakay. Ang trak halin sa Antique, wara it pasahero ay mga alas dos pa lang sa kaagahon kag tuyo nga magsugat sa  mga taga-Antique nga manaog sa barko halin sa Manila. Samtang nagadalagan ang trak, ginahampangan kang bata ang bola na, gani nabuy-an na kag nahulog kang sa tadlong ron sanda kang simbahan. Nagligid ang bola sa tunga kang karsada. Ginpadulog kang tsuper ang trak kag nanaog ang konduktor agud puruton ang bola. Naghambal ang koduktor nga indi na madara ang bola, gani nanaog ang driver agud tana ang mabuol kang bola. Pay indi na man maalsa ang bola. Gindarwahan nanda kang konduktor hakwat ang bola pay indi man nanda madara. Nanaog ang bata kag nagkuon nga, "Indi kamo makadara? Kamag-an gid lang ka dya." Ginpurot kang bata ang bola kag ginpaumpok-umpok samtang nagapadulong sa simbahan kon diin nadura tana. Nagdulog ang driver kag konduktor sa kapehan ni Tya Chata agud mangayo kang mainit nga tubig ay ginakulbaan sanda tungod ginbagat kuno sanda. Natabo dya kang panugod kang  dekada 60.

 3. Ang Niño sa Pil-as. May mag-asawa nga nagasakay sa anda awto,imaw ang bata nanda nga masakiton. Hinali lang nag-aberiya ang sarakyan kag nagtakilid sa bibi kang pil-as. Nagbukas ang pwerta kang sarakyan, gani nahulog ang bata kag nagbulidbulid paidalom sa pil-as. Sa katingala kang mag-asawa, wara magderetso sa idalom ang bata,kundi nakatakras pabalik sa sarakyan nga wara man maano. Naglibog ang ulo kang mag-asawa kon paano nakasaka pabalik ang bata, ay wara labot nga wara tana it sarang mapangurabtan, may diperensya pa tana. Nanugid ang bata nga may bata kuno nga lalaki nga nagauyat kang globo sa ana wala nga alima ang nagsagang kana, kag ginbutong tana pasaka. Napasibusibo kang mag-asaa nga Sto. Niño ato, gani nagpilgrimage sanda sa lainlain nga mga simbahan nga may patron nga Sto. Niño sa pagpangita sa Niño nga gina laragway kang anda bata. Pay ginakuon kang bata nga wara sa mga imahen nga anda nakita ang pareho ang hitsura kang bata nga nagluwas kana. Sangka adlaw, nakaagi sanda sa simbahan kang Tigbauan. Nakita nanda nga may retablo kang Sto. Niño sa facade kang simbahan, gani naghapit sanda bisan indi Sto. Niño ang patron  kang banwa. Nagapuni si Ramona kang karo kang Sto. Niño (ginahanda para sa prosesyon ay vesperas kang pista Senior kato) kang magsulod ang mag-asawa nga nagasunod ang anda bata. Nagaistorya ang mag-asawa kay Ramona kang hinali lang nagtuaw ang bata nga, "Amo na siya! Amo gid ina siya!", samtanag ginatudlo ang Sto. Niño de Tigbauan sa ibabaw kang karo. Natabo dya nga insidente kang dekada 70.