Kang bag-o lang matapos ang gira, si Ramona nga apo ni Insik Jose, ang una nga Katoliko nga Insik sa Tigbauan gintublag kang sulitsulit nga damgo parte sa bata nga lalaki nga ana ginalibang. Tungod pirme nagabalikbalik ang amo man gihapon nga damgo, ginsugid na sa pari ang amo nga bagay. Ginhambalan tana kang pari nga ang bata nga lalaki sa ana damgo, mahimo nga amo ang Sto. Niño. Gani, nag-agto si Ramona sa Fundidor s a diin may mga eskultor nga nagapanghimo kang mga imahen kang mga santos gamit ang kahoy. Nagpaobra tana sa eskultor kang imahen kang Sto. Niño nga daw anum ka tuig nga bata ang kahanggudon. Ang imahen ,ginpabendiyonan na kag ginpahamtang it permanente sa may dose ka tapak nga kataason nga pedestal sa altar kang simbahan kang parokya kang Tigbauan.
Kang 1948, ang linog nga may kabaskugon nga Intensity 6, nagtay-og sa Tigbauan. Narumpag ruman ang temporaryo nga backdrop kang simbahan kag nahulog ang Sto. Niño sa pedestal pay wara man maano. Nagtabog lang ang ana korona pay wara na mabuy-an ang kalibutan nga ginauyatan na sa ana wala nga nga alima. Ang tuo na nga alima nga nagasenyas kang "Paghidaet" ang turudo kag katung-anan nga mga tudlo, wara man mapungil.
Kada pista kang Senior, ang imahen ni Senior Sto. Niño ginapailisan kang bag-o nga biste kag kapa , dayon, ginakarga sa karo kag ginaprosesyon. Napatay si Ramona kang tuig 2004,sa edad nga sobra 100 ka tuig, pay bilang tradisyon kang pamilya, ang ikarwa nga Sto. Niño sa simbahan kang parokya kang Tigbauan, padayon nga ginaprosesyon kada Pista Senior.
No comments:
Post a Comment