Nagâ Nagadebosyon ang mga Insik sa Sto. Niño sa Tigbauan?

     Si Uy Hio Co, nakasalapid ang buhok nga Insik ang naghalin sa Amoy, Tsina kag nangayaw rugya sa Ilong-Ilong sa pagnegosyo kang kandila. Nagdayon tana sa balay kang mag-asawa nga mga Katsila nga mga Benedicto.sa Salog (Jaro). Marapit sa simbahan kang Nuestra Sra. de Candelaria ang amo nga balay. Ang negosyo kang pamilya Benedicto amo ang paghimo kang mga bulak nga papel. May bata nga daraga ang mag-asawa nga ginahingaranan kay Teresa. Nagluyagay sanday Uy Hio Co kag Teresa, pay nagasambo sa pagpamatok ang ginikanan kang daraga, gani nagpamat-od ron lang ang magkatipan nga magtabanay.

     Nagpalagyo sanday Uy Hio Co kag Teresa kag nanago sa kumunidad kang mga Insik sa Parian (Molo). Natultulan sanda kang mga ginikanan ni Teresa, gani nalagyo ruman sanda, asta nga nakadangat sanda sa Tigbauan sa sobra nga panago. Nangabuhi sanda paagi sa paghimo kag pagbaligya kang kandila kag bulak nga papel. Nangin hermana si Teresa sa parokya kag tana gid ang nagapangalima sa pagpuni kang simbahan. Kon kis-a nagaabat si Uy Hio Co sa simbahan kag mag-usyuso kon ano ang ginaobra kang asawa. Pay sangka bes, nagatururo ang luha ni Uy Hio Co nga namangkot, "Telesa,ngaa ako gani sulot inyo simbahan, talikot Nino?" Ginsabat tana ni Teresa nga, "Ano abi kay wala ka mabunyagi". Gani, nagpabunyag man matuod si Uy Hio Co. Ang Kritiano na nga ngaran amo si Jose,kag ang ana apelyedo, Gonzales, sunod sa apelyedo kang ana maninoy.Gintawag tana kang mga tao nga "Insik Jose".

     Sangka hapon nga nagadabodabo, ginlihog ni Teresa si Insik Jose nga idul-ong sa simbahan ang mga human ron nga mga bulak nga inogpuni sa altar. Pagsampot na sa puerta kang simbahan, nalantawan na ang Sto. Niño nga nagapaturo sa uran sa balisbisan kang simbahan. Ginbuy-an na ang binungkos nga mga bulak kag naghuyab pauli. Nagahangos nga ginguyod na si Teresa agud ipakita ang nagaparigos nga Niño. Pag-abot nanda sa simbahan, turon nagapasaka sa altar ang Niño. Ginhikap nanda ang imahen kag basa pa ato. Nagdalidali si Insik Jose agto sa mga Insik sa Parian. Rayû pa gani, nagasinggitan ron nga, "Tuot git! Tuot git ila Dios!". Ginhagad na ang mga Insik nga magpabunyag man kag magdebosyon sa Sto. Niño sa Tigbauan. 

     Ang amo nga imahen nga human sa bronse, natampukan kang narumpag nga bahin kang simbahan kang ginbombahan  kang tiempo gira ang edipesyo. Nakalkalan ang imahen kang ginrepair ang simbahan kang 1997. Gin-install sa pedestal sa baptistry kag gin blesingan liwan pay nadura kang wara ron si Fr. Eleuterio Carton.