Ang Una nga Imahen kang Sto. Niño sa Tigbauan

      Kang mag-abot ang mga katsila nga konkistador sa Katigbawan (Tigbauan) halin sa Sugbo (Cebu), may imaw sanda nga mga prayle nga may dara nga imahen ni Hesukristo nga ginpakilala nanda sa mga pagano nga tumandok nga amo kuno ang matuod nga Dios nga gamhanan kag manluluwas kang kalibutankag ginatawag nanda kay Hesus.

     Kang una gid nga pagkakita kang mga tumandok sa mga Katsila nga nagasakay sa kabayo kag nagabayaw kang krus,nagtaral-as sanda sa kahadlok. Abi nanda, ang tao kag ang kabayo, sugpon pareho kang tayhô

. Ang panurok nanda sa krus, polo kang kampilan nga ginpasuli. Nagaparanuhot sa idalum kang kabalayan ang mga konstable sa pagpangita sa mga tumandok agud tipunon kag tudluan kang dara nanda nga bag-o nga pagturuohan. Nabudlayan sanda nga papatihon ang mga tumandok nga si Hesukristo nga nagadupa kag nalansang sa krus, amo ang Dios ay namusingal kang dugo, natata ang lawas kang pilas kag patay ron. Nahadlok ang mga tumandok sa krus. Naduram sanda sa patay. Pay kang ipakita kananda ang imahen kang Sto. Niño nga mahagop ang hitsura, mabuot turukon kag kanami daluon, daw gintutoy sanda parapit. Naganyat sanda nga pangilalahon ang ginatawag nanda nga Sto. Niño. Duna gid man sa mga tao, bisan ano pa nga lahi, ang mahamuot sa bata,gani madali nga nabuyok kag nahulog ang anda buot sa bata nga Ginoo nga amo si Señor Sto. Niño Hesus. Nangin mahapos sa mga prayle nga mapahagop kag matudluan ang mga tao kang Kristianismo.

     Ginsugdan kang mga prayle itudlo ang Kristianismo paagi sa Pagkatao ni Hesus. Ginpatan-aw sanda kang altar nga may Belen, kon diin may imahen ni Birhen Maria, ni San Josef, kag ang Niño Hesus nga nahamtang sa pasungan. Bisan ang pagpatpat kang kasaysayan paagi sa karantahon nga Latin kag Kinatsila, nahanuklog ang mga tumandok kag ginkilala ang Sto.Niño nga amo ang matuod kag buhi nga Dios.

     Kang urihe, agud nga labi pa gid nga mahaylo ang mga tao nga pamalandungan ang Pagkatao ni Hesus, bisan indi nanda mahangpan ang panghambal, ginpasundayag kang mga prayle ang istorya paagi sa drama-drama nga ginatawag nanda nga zarzuela. Ginhiwat dya tagsa ka tuig antes ang Pagkatao sa Disyembre kag pag-abot sa Enero, ginaprosesyon ang imahen ni Sto. Niño  kon sa diin ginapaharok kag ginapalapakan ang mga tao. Amo ron dya ang ginatawag nanda nga Pista Señor.