Nagapanahid gid kuno kato ang mga mangingisda nayon sa Barroc kang malantawan nanda sa unhan, halin sa lawod ang daw simbahan kataas nga balod nga daw nagapaagto sa anda nahamtangan nga daray-ahan. Kon maghampas kuno ang amo nga balod, magalanas sa bilog nga banwa. Nagdinalagan nga nagasininggit ang mga mangingisda kag ginpuhag ang mga tao nga maghingagaw palagyo sa wara pa makaabot sa binit-baybay ang higante nga balod.
Nagsakâ ang mga tao sa mataas nga lugar sa gwa kang banwa nga ginatawag nanda nga 'takas-banwa". Nagakurudog, nagapanangis kag nagapinangadi sanda samtang ginalantaw nanda ang nagapadulong nga balod. Pay sa anda kahayanghag, amat-amat nga nagkulpa ang balod kag daw nagabalik sa lawod. Sa ibabaw kang amo nga balod, may nakita sanda nga bata nga daw mga anum ka tuig ang kahanggudon. Nagadurudalagan paagto-pabalik ang amo nga bata nga daw sa nagahampang, samtang darayon nga nagausmod ang tubig asta nga nangin kinaandan ron lang nga balod kag wara madayon nga matabunan kang tubig ang bilog nga banwa.
Ang mga tao nga nakasaksi kang amo kato nga katanhagaan, bug-os ang pagpati nga isara gid ato ka milagro kang Sto. Niño. Amo to ang ginsugdan kang pagdebosyon, pagpadungog kag pagpasalamat kang mga tao paagi sa misa, pagpangamuyo kag pagprosesyon sa Sto. Niño nga ginkilala nanda nga milagroso kag Tagluwas kang bilog nga banwa kang Tigbauan.
No comments:
Post a Comment