Hinadlukan ako nga ang amon kabuhi asta ron lang dugto ,
Gani nga si Toto akon gin-alungay nga kami malagyo ,
Pay indi gid tana tungod kay maluya, kuno delikado
Basi nga madakpan,por medyo lang kana gani indi gusto.
Sa tungang gabi-i, akon nga ginpirit, tuyo ko gid dar-on,
Pay awat gid lang ay indi gid magsunod bisan nga guyudon;
Magdayon lang kuno kami kag palabyon ang kaugalingon
Pabilin lang tana kag ipangamuyo kaluwasan namon.
Nagatururagay ang akon luha ay si Toto bayaan ,
Hipus ko ginkup-an nga daw malupok ang dughan;
Sa akon nga paghakos , daw indi ko tana pagbuy-an,
Gali amo ron lang to ang pagkitaay namon nga katapusan.
Madulom nga selda sa idalum lupa, destinasyon nanda
Nagagirinutok , indi makabatang, ; tindog lang mag-aga.
Indi makaturog, inoras , inadlaw,; katuyo gin-agwanta,,
Ang dingding nga hamug, kag basa nga salog, dugang sa pagkagha.
Kon sanda mag-inom, 'gaturo nga uran kang palad saludon;
Ang anda pagkaon, sanghakop nga kan-on, sa palad man galhon,
Ang ginapadapli, 'gaaso nga tangkong,may gamot kag lay-on;
Amo to nga selda ang apa nga saksi kay Toto trahedya.
(Note:Sing this composo to the tune of Ako Ining Kailo) Dya nga composo nagasugid parte sa death march kag sa dungeon sa Camp O Donnell, Capas , Tarlac nga gin -presohan sa mga nabihag sa Bataan bag-o sanda gin massacre kag gintagbong sa mass grave.
No comments:
Post a Comment