Daigon sang Tigbauanon

 I.Pagpanamkon

      Por siempre, Mesia bendito,

      El Senyor sacramentado,

      Kabay panghatagan kamo,

      Sing kagab-ihon nga maayo.

      

      May isa ka putling dalaga,

      Birheng ulay nga may bana,

      Ang ngalan niya si Maria,

      Si San Josef ang iya bana.

       Si San Josef nga palaran,

       Panday nga labing maalam,

       Maalam kag dakung panday

       Bana sang Birhen nga  ulay.

       Ginhimo siya kag gintan-ay,

       Kag sang Dios nga ginpaangay,

       Kay Maria, iloy nga tunay,

       Si San Josef, mangin amay.

       Si San Josef natingala 

       Sa Birhen Santa Maria,

       Ang tiyan niya daku na,

       Sa wala'y bangod nga mas-a.

       Si San Josef nanginsungunan,

       Nagpakadto sa simbahan

       Gilayon ni Maria kadtuan 

       Si San Josef sa simbahan.

       Kag iya nga pinamulungan,

       "Bana ko nga nalulutan ,

        Anano ang bangod man ayhan ,

        Nga imo ako binayaan ?"

      Nagsabat si San Josef sa iya,

      Birhen Santa Maria ,

       " Ang baston ko kon mamulak na, 

         Magauliay kita nga duha".

     Halos nga matapos ang pulong,

     Ang baston namulak sa gilayon,

     Namulak man kag nanahon,

     Matahum nga wala'y subong,

II.Pagbusong

      O, senyor tagbalay, lunsay nga dungganon,

       Bisan mahamuok inyong katulugon,

       Bugtaw kamo anay kag inyo kami gawahon ,

       Mag-asawang pobre nga yari sa silong. 

       Kay ako si Josef nga taga-Galelia ,

       Ang akon kaupod mahal kong asawa,

       Kon paghingalanan amo si Maria,

       Sa mga paglakat binudlay nga sobra.

       Sa banwang Nazareth kami ang nagikan,

       Ang lugar nga ini amon kinadtuan,

       Kaming magtiayon nga may kalisdanan,

       Sa mga paglakat ,kami nagab-ihan.

      O, nobleng tagbalay, kon sarang inyo hangpon,

      Bisan si Maria lang inyo  pasakaon,

      Kay ako sing akon yari lang sa silong,

      Magapahuway lang sang akon kakapoy.

      Ang labi pa gid nga ginakagha, 

      Kag ginatulo sang akon luha ,

      Kay ini si Maria,madali na lang magbata, 

      Kon sarang , tagbalay, kami pasakaa.

      Sabat sang, tabalay, "Padayon lang kamo,

      Kay didto sa unhan, may kamalig didto".

      " Tindog ka Maria, dali sa paglakat,

         Malapit na lang ayhan ,basi ta madangat".

     Anay umabot ang tunga sang gab-i,

     Amo'ng pagkatao Mesia nga pobre,

     Gilayon ginduaw sang mga angheles, 

     Ginsimba, gindayaw sang mga pastores.

III.Pagkatao

       O, Hesus Nino Infante,

        Natao sa pagkapobre.

        Higdaan, miserable

        Wa'y banig kundi dagami.

        Yadto'ng kamalig nga guba,

        Nga ginahigdaan sang bata,

        Nga daw tiposo kag daw mutya,

        Ni isa wala sing naawa.

        Kailo, wala'y lupon-lupon,

        Bisan dahon wala sing tabon,

        Kailo, wala'y naluoy 

        Kay pobre ining redentor

     

       Maayo pa ang mga hayop ,

       Mga baka kag mga asno,

       Sa Iya sila nagaluhod ,

       Nagasimba kag nagatahod.

       Maputi nga daw ang lino, 

       Matin-aw nga daw kristal nga baso,

       Ang pagkahumot daw lirio ,

       Sang pagkatao ni Kristo.

      

       Maputi nga daw sa asin,

       Masinaw, labi pa sa salaming,

       May pagkahumot nga daw hasmin 

       Ang pagkaputli sang kasingkasing.

       Sing maayong gab-i panghatagan,

       O, tagbalay nga dungganan,

        Ang sayop namon kag kulang ,

        Dispensahon ninyo lamang.

       Adios, Adios O, tagbalay,

       Magabulag kita anay,

       Kami anay mapaiway ,

       Dios lang sa aton, magbantay.

IV.Ang Tatlo Ka Hari (Villanceco)

       Ang tatlo ka hari, nagduaw man sila,

       Nga gikan sa Persia, Arabia kag Sabah

       Malayo nga lugar ang ginhalinan nila,

       Malapit sa Sidlangan, banwang Palestina.

       Sila gituytuyan, bituon nga masiga ,

       Kon paghingalanan suga nga kometa.

       Ginlakbay ang bukid, masiot nga wala'y samat, 

       Sanglit dromedario, ang ginsakyan nila. 

       Melchor kag Gaspar ang ila nga ngalan,

       Baltazar ang ikatlo, wala'y makatulad,

       Sampaton nga pantas kag mga mapalad,

       Gamhanan sa langit, sa duta bunayag.

       Amo ini ang ginaasoy sa santos nga libro, 

      Sila ang may dala,mira kag insenso,

      Bulawan nga tunay amo ang ikatlo ,

      Nga ila nga halad sa Divino Verbo.

Kang pagkatapos kang guerra mondial,ginbuhi liwan kang cura paroco sa Tigbauan ang selebrasyon kang Pagkatao paagi sa misa sa tungang gabii.Ginpasaylo   sa binisaya kang pari  ang kasaysayan kang  Pagkatao sa Historia Sagrada nga nasulat sa Espanyol  kay Marina Gonzales Tejero nga anum ka tuig bga interna sa Beaterio de Molo , gani kamaan magkinatsila. Gintonohan kag ginkanta sa simbahan kang mga cantoras nga tagabanwa kag mga Napnapanon ang istorya, 

Ang pinakauna nga nagdaigon ka dya nga kanta amo ang mga cantoras kag cantor kang Napnapan nga sanday Lourdes Tura, Basilia Trompeta, Tomasa Trompeta,Maxima Trompeta, Marina Tejero kag Mariano Torrecampo. Asta tulad, kon mabatian kang mga tagabanwa ang amo dya nga daigon, makuon dayon sanda nga :"Mga taga -Napnapan ra ".Nagpangayaw ang mga cantoras nga Napnapanon sa Negros kag sa Mindanao sa pagpamugon,pangani kag panghugot kang monggo, Gintudlo nanda sa mga tagadugto ang anda mga daigon , gani kamaan man ang taga- Negros kag taga-Mindanao kang amo nga mga daigon.