Viva! Senior Sto. Niño

(Dayaw sa Sto. Niño, Jan. 1994)

Written by: Maria Luisa Tejero Torrento

I.    Diutay nga Hesus, Prinsipe sang Kalangitan,
      Kami nagasimba sa Imo Mahal nga Ngalan;
      Ang pagpadungog namon sa Imo paagi sa Kapistahan,
      Kabay Imo mahamut-an kag bendisyonan.


II.  Mahal nga Niño Hesus nga amon Mesiyas,
      Ginpadala sang Amay agud sa amon sala maghugas;
      Sang bug-os nga kalibutan Ikaw ang Manluluwas,
      Sa tanan nga hari, Ikaw ang Labing Mataas.


III. Sang Ikaw mag-abot sa sining dutang luhaan,
      Nag-amba ang mga angheles sa kalangitan;
      Liwat ginbuksan sang Amay ang ganhaan sang Iya
      ginharian,
      Kag ang mga tao nakaangkon sing kapatawaran.


IV. Daku ang amon kalipay sa Imo paghari sa duta,
      Kay ang kalibutan nakaangkon sing kapawa;
      Gani, sa Imo ginahalad ang himpit nga pagpalangga,
      Pagdayaw kag pagsimba nga wala sing husa.


V.  Ikaw ang labing hamili nga regalo sa katauhan,
     Ikaw ang amon Manunubos kag dalangpan;
     Tagpangapin batok sa katalagman kag kalalat-an,
     Ang kalibutan, sang Imo gamhanan nga kamot
     ginauyatan.


VI. Sa amon kabuhi, bituon Ka nga labing masanag,
      Sa madulom nga dalan, iwag sang paglaum ang Imo
      hatag;
      Ikaw ang manugtuytoy padulong sa kaluwasan sang
      amon kalag,
      Amon Manogbalantay agud sa panong indi mahamulag.


VII. Ang bug-os nga kalibutan nagayaob sa Imo,
       Kay Ikaw ang kabuhi sang kalag sang tanan nga tao;
       Bulahan ang mga sumulunod Mo,
       Kay ila ang Balaan Mo nga pagpakamaayo.


VIII. Papag-una kami sa tion sang pagsulay kag pagkagha,
         Buligi kami nga masubay ang tadlong nga banas nga
         Imo takda;
         Itugot nga mabuhi kami nga pirme nakahanda,
         Nga makaupod Ka sa wala’y katapusan nga himaya.


IX. Mahal nga Senior Sto. Niño, inspirasyon sang mga
      taga-Tigbauan,
      Ang Imo mga milagro lapnagon kag nabantugan;
      Gani sing himpit nga pagtuo kami wala gid madulaan,
      Kag ang Imo pagbuot amon ginatuman.


X. Halin sadto, tubtub sa karon nga inadlaw,
     Ang Tigbauan sa Imo nagasimba kag nagadayaw;
     Bisan ang tagamalayo sa Imo nagaduaw,
     Nagaampo, nagapangamuyo kag nagatamyaw.


XI. Kabay nga Imo ubayan kami nga mga Tigbauanon,
      Kag ang tanan nga may maayong kabubut-on;
      Kabay nga mapadayon sang tanan ang pagdebosyon,
      Sa Imo nga Amon Manluluwas kag Patron.


XII. Dayawon ta si Hesukristo nga Aton Ginoo!
        Viva! Viva Senior Santo Niño!